نفسيّة !

مَاذا هُو “أنا” ؟

https://i0.wp.com/img2.imageshack.us/img2/3348/ana.png

تصنيف من ضمن تصنيفاتي بهالمُدوّنة !

و للأمَانة يوم إنّي حطيته ما كنت أقصد معنَاه حرفياً !

بس اليُوم ، أقف وقفَة صدق مع نفسي و أقول “ماذا هُو أنا؟” :/

.

.

مُؤخراً “من أسبُوعين أو ثلاثة” بديت ما أعرف نفسي ! ما أعرف وش أبي !

ما أعرف وش يزعلني ! و وش يفرحني ؟___؟

فجأة أزعل ! و فجأة أحقد ! و فجأة أحلل الموقف على مَزاج مَزاجي !

أتحسس من أتفه الأشيَاء !

أشيل هَم الأشيَاء الغبيّة ! و أطنّش الأشيَاء الكبيرة !

ودّي أبذُل جهدي ! بس أعيي ! ايه كذا أعيي من نفسي و لا أدري ليه أصلاً !

بس كذا دامني ماأبي و مدري ليه أصلاً ماأبي !

فمُوتوا جميعاً و اللي ما أبيه ما أبيه لو إنّه ينفعني !

.

بس اليُوم الحَال تدهور و بديت أدخُل بالذمم !

و أحلل شخصيّة المخلوق اللي قدّامي على كيفي !

أركبه ذنب هو مو قاصده و أنا أعلم في قرارة نفسي إنّه حتى مافكّر باللي أفكر فيه !

.

تلقُوني بالأيّام معصبَة ! ما أبي أحد يكلمني !

في المحاضرات أروح بعيد عن صاحبَاتي لأنّ مالي مزاج أتكلم و لا أسُولف !

لا و الحين عرفت إني أبعد عنهم لأن ماودي أفك غلّي فيهم !

طيب ستُوب !!! ستُوب !!!

هذا كله !! ليييييه !!!؟ لييييييه بس :”(

ودّي أعرف و الله !!!

.

هل قط مرّيتُوا بذا الحَالة !

تشبّون ع اللي حُولكم !

تنتقدُون كلش حتى لو إنه عاجبكم <_<“

تنعزلُون و تنطوون و تشوفون كل شي غلط×غلط !!

و تبدؤون تفكرون بطريقة عكسيّة لكل شي !

حتى الناس الطيبين تبدُون تقلبُونهم أشرّ مخلوقات الله !

+ ما عاد تبُون تطلعُون من البيت نهائي !

لأن كل شي برا البيت “قـبـيـح” ! حتى لو كنت في السّابق “أحـبّـه”

و الأدهَى و الأمرّ !

تبدُون تسترجعُون الذكريَات الماضيَة !

و تتغنّون في أيّام زمَان !

و في النّاس اللي كانُوا حُولكم أيّام زمَان :”(

.

البَلا ، إنّ هالشي بدأ يؤثر بصحتي مباشرة !

لأن كل ما زادت هالمشَاعر ! كل ماحسيت بألم !

لدرجَة الأسبُوع اللي فات غبت يُومين عن الجامعَة بسبب انخفاض موب طبيعي في ضغط دمّي :”(

و بدأت تطلع في وجهي حبُوب و مع إنها تروح إلا إن مكانها موجود لا و أحمر :/

.

تحسّنت اليُومين اللي فاتُوا !

بس اليُوم رجعت لي الحَالة و أحسّها أقوى :”(

أحسّ إنّ العالم الخارجي “وحش” أو كأنه “خذلني” :”(

خذلني ليش و كيف و متى !

الله أعلم :”(

.

اقترحت نتصَالح أنا و نفسي بس شكلها معيّة و بشدّة :”(

شالسّواة بس :”( شالسوَاة :”(

ودّي أرجَع زي زمَان :”( ضحك و وناسَة و حماس و أرمي الدنيَا ورى ظهري :”(

نفسي القبليّة ، وينك  بس ؟

6 thoughts on “نفسيّة !

  1. فيافي ق1 ق1
    روقي انشالله مافي شي لاتوس وسين بس انا كد جتني الحاله هاذي كثيير بس اكثر من يوم ما اقعد فيها
    حتى احيانا يناظروني الناس وانا كذا صممت ولا اقدر اسوي شي وابدا احلل كل شي خطأ واكره كل شي وكل شي بايخ ولا ابغى شي كل الي ابغاه باختصار ما ادري وشو اكره نفسي لا صار فيني كذا
    انا معك وش السواه من جد حتى صحباتي بدو يعصبون مني لاني يحسبوني اكرهم او شايفه نفسي عليهم
    انا عصبيه من يوم يومي بس اذا جتني هالحاله اصير غغير !! والله مجربه الي تمرين فيه
    الله يعين ويخلصك من الحبوب وترجعين زي اول انشالله قريبا >_< مفروض نسوي حمله ابتسم ض1
    لان الصراحه الي يصير مو هين وش يغغت خصوصا لا بديتي تشوفين البنت وتطلععين كل شي فيها
    يعني جد ووشو هذا وش سالفتنا !! لا جد :(

  2. ايييه ياجي :”(
    قسمن بالله مهيب حالة ! أسبوعين و إلا كم ! بطلت أعدّ :”(

    بس الحمدلله تقريباً طلعت الأسبَاب و بديت أعالج نفسي و أحاول أغير هالنفسية المخيسة
    ماصارت ! تخيلي زعلت وحدة من صديقاتي و أنا و الله مو قصدي أزعلها :(
    بس ماش المزاج خياس :( أيّ أحد يكلمني بالوقت الغلط ، متأكدة بيطلع من المحادثة و هو يكره
    الساعة اللي كلمني يها :/

    بس على قولتك نجاهد و نبتسم و نحاول نفرفش : )

    و تسلمين ع الرد و الله ، شعور جميل تحس إنّ احد يشاركك معاناتك XDDD

  3. سبق مرت فيني حاله تشابه حالتك
    طول الوقت متضايقه وماادري وش السبب
    طول الوقت معصبه .. بالاصح زعلانه ومتضايقه ومعصبه من شي ماادري وشو ولا ادري هو فيه شي اصلا ولا لا
    لما اجلس مع خواتي كل شي احسه بايخ وعاده يقولون شي عادي او شعورهم مثلا اتجاه شي قد يكون ما يعني لي لكن اتنرفز واقول كم كلمه بايخه وعاده اقوم من عندهم
    بالجامعه بديت اتهرب من جمعات البنات ولما تسالني اقرب صديقاتي الي معي في كل محاضره احط اللوم عليهم وصرت اقولها مصدعه او اتعذر مثلا بكتابه محاضرات او اي عذر واروح اجلس بالمكتبه اغلب الوقت
    والعالم الخارجي هذا مسحته من قاموسي اصلا
    وزي ماقلتي احن لايام قديمه مع انها ماكانت تعني لي الكثير وبديت ارجع الصله مع زميلات الثنوي مقتصره على مسن ومسجات مع اني قبل شبه انقطعت عنهم
    وصرت اشوف الجانب الظلم بكل شي وكل حاجه اترك الجيل فيها واطالع لاصغر العيوب
    وغيره وغيره

    بعد ماتعبت من نفسي وحاولت احل المشكله لفتره طويله عرفت انها جتني مع مرحله انتقاليه بحياتي مثلا جتني اول مادخلت الجامعه ولما تخرجت بعد ولما غيرنا بيتنا واكبرها لما كبرت و لاحظت ان الكل حولي عنده هدف ويتطورون وانا واقفه

    يمكن بديتي تلاحظين ان فيه هوايات مثلا او عادات او حتى ناس كنتي تمارسينها ومتعلقه فيها ووبديتي تكرهينها او تخففينها او ماتستمتعين فيها مثل اول مع انك بداخلك تتمنين تتمسكين فيها لانها مهمه لك او تنظرين لها كجزء منك وتخافين تفقدينها
    ماادري اذا كان السبب معك مثل سببي او لا لكن لاحظت انك طالبه تخرج السنه هذي وهذا احتمال كبير يكون السبب
    واذكر مر علي انه هالحاله تتكرر مع ( الاخت الكبرى ) فماادري انتي اكبر الخوات او لا
    خلاصه الكلام ان الي تمرين فيه ماله سبب معين وحله الوقت بس وقوه ارادتك لا تتهاونين وتقفلين على نفسك وتقولين ان هذي انتي الجديده و ايضا لا تكبرين الموضوع وتخلينه هو مشكله كبيره بحد ذاته

    الموضوع صار له اكثر من اسبوعين بس فتحت الرد وكتبت بدون ما احس وماابي اطلع واقرا وش كتبت لاني اعرف اني بمسحه فعذرا على الحوسه بس بودي افضفض : )

  4. والس ! : |
    من يقول كلامك كله صح تقريباً !!
    ايه أنا أكبر أخواني :/ و تخرج :/
    و تقريباً نفس الأعراض اللي تقولينها فيني الحين !
    و مع إني أخدع نفسي كل يوم و أقول إني عديت هالحالة إلا إنها تزيد للأسف !
    و الطامة الكبرى نفسي صارت تبررها إني أنا “كبرت” الحين و عقلت
    و صارت فيه أشياء ماعادت تستهويني مثل قبل !
    تدرين إني صرت أكره الجمعات اللي نقعد فيها بس نسولف !
    أحسني أضيع وقتي على و لا شي ! كذا خمس ست ساعات نسولف !
    مع إني سابقاً كان هالشي عادي جداً عندي ! بس الحين لأ ! أحسني كبرت و استوعبت
    إن حكاوي البنات و سواليفهم مالها داعي و لا راح تضيف لرصيدي شي !
    المشكلة حتى كلام الجامعة دخلته ضمن هالشي !! لاحظت إني ماعاد صرت أحكيهم
    عن نفسي و عن بيتنا و عن سواليفنا زي أول ! كل اللي أقوله إني طفشت من الجامعة !
    طفشت من الدكتور ! طفشت من المحاضرة ! أبغى أتخرج !! تقريباً مصدر غثى للأسف !!

    بس الشي المختلف عنك إني بالبيت طبيعيّة 100% و مافيني شي أبد :/
    أمي و أختي أسولف لهم عادي و حتى السوالف الفاضية أطلعها معهم :/ حتى لو طفشانين ما يبون
    يسولفون معي مو بكيفهم بيسمعون السالفة لو بالمهاوش :/
    هالشي كويس بس بالمقابل قاعدة أهدم علاقاتي الاجتماعية خارج نطاق العائلة !
    أمي تقول هذا شي طبيعي لوحدة بتتخرج هالسنة :/ و تقول أصلاً أنا يوم كنت بالابتدائي
    كنت ماأسولف بالمدرسة أبدن بشهادة المعلمات و كنت ثرثارة بالبيت عندها !
    فشكل العادة رجعت لي الحين :/ ياشيخة حوسة منجد حوسة !
    الناس يحسبوني أنا اللي متكبرة أو اللي ما أبيهم أو مسوية هالحركات لأني أشوف إنهم يجرون
    وراي و يعشقوني :/ تخيلي وصلت لهالمواصيل : (
    هالشي كرهني بالكلام زيادة : (

    و حابّة أشكركِ فعلاً فعلاً فتحتي عيوني على أشياء ماكنت أعرفها أو ماكنت أحس فيها : )
    الحمدلله إنك مامسحتي الكلام : ) و عن الحوسة أقري التدوينة اول و بتعرفين وشهي الحوسة XD
    الله يسعدكِ يارب ق1ق1ق1 نوريتي الحتّـة ق1ق1ق1

  5. تصدقين عاد مامر علي احد بيتخرج الا وقال انه وصل حده ويبي يتخرج باسرع وقت
    اخر ايامي كنت والله اجاهد اقوم من السرير عشان الجامعه (_ _”) كنت كئيبه بشكل

    خليني اقول لك قصه اثرت فيني حاولت ادور وين انا قاريتها فيه عشان اجيبها مضبوطه بس مالقيتها
    المهم خليني اقولك الخلاصه .. هو عالم او موسيقي او شي كذا عبقري نسيته والله :( .. المهم اصيب في رجوله كلهم وانشل وكان عمره كبير شوي وقالوا له الاطباء مالك علاج ابد راح تضل طوله حياتك مشلول لكن هو رفض كلامهم ورفض العكازات وكان يتحامل على نفسه كل يوم كل يوم يزحف بالممرات وكان يقول مايبي ينسى شعور انك تتحرك بنفسك بدون اي مساعده وماراح يخلي جسده يستسلم واستمر يزحف على بطنه ويمكس باي شي ويحاول يقوم لفتره طويله طبعن نسيت كم :$ لكن بالسنوات لحد ما بدا يحس بس احساس برجوله واستمر لحد ما حقق معجزته بنفسه ووقف على رجوله وقام يمشي بدون اي مساعده
    طبعن انا خربت القصه بهالاسلوب XD بس من جد قصته تخلي الواحد يفكر
    الي ابي اوصله من هالهذره انك لا تستسلمين وتقولين هذا انا او هذا شي طبيعي وانا بس ” كبرت ” ! وتتعذرين لنفسك اشياء ما كنتي تخلينها بالعاده او نفسك القديمه كانت بتتمسك فيها

    ماالومك لان المجتمع نفسه مجتمع رتيب وممل ومتكرر بشكل عام والجامعه نفس المجتمع بس مصغر شوي
    يمكن انتي متوقعه شي مختلف بسنتك الاخيره او اقلها ( شعور ) مختلف كونها الاخيره
    والي انتي فيه اتوقع مجرد تشبع ! حشو حشو حشو كل السنوات الي راحت وهي مثل ماقلتي ما تضيف لك شي مجرد تقطيع وقت فشي طبيعي توصلين لمرحله تطقين فيها خصوصا اذا كانت الجلسه روتينيه
    ممكن تكونين ماتبغين السنه الاخيره تكون كذا ؟
    وسالفه البنات من جد الله يعينك عليها .. فيه ناس دايم يفترضون الاسوا بكل الاحوال, لا تضغطين على عمرك عشانهم ولا تخسرينهم تماما حاولي تشوفين حل وسط
    لا تقولين انك جالسه تهدمين علاقاتك ! خوذيها على انك محتاجه بريك لانك بالاخير راح تطلبين هالعلاقات لان علاقات العائله او النت مثلا ما تملى كل الي تحتاجينه من التواصل مع العالم .. فانا ماني بذيك الانسانه الاجتماعيه , مااقول اني انطوائيه بس تقدرين تقولين اني اقدر الجلسه مع نفسي XP وغالبا ما اعتذر عن الدعوات من غير اقرب صديقاتي وماني من عشاق السواليف بالتليفون .. لكن بين فتره وثانيه القى نفسي انا ادعو احد يطلع معي او اعزم روحي عنده او اتصل باحد من فتره عنه وكذا ^^
    فلا تتضايقين ابد ولا تخلينه سبب يضيق عيشتك او ياثر على دراستك وتذكري ان الانسان يحتاج وقت عشان يجمع ويستوعب حالته ووش المشكله فيه
    صدقيني كل الي تحتاجين هو وقت بس وبلاش الافكار السوداويه وحاولي تتعرفين على نفسك اكثر XD بتذهلك اكثر الاشياء الصغيره الي راح تكتشفينها .. ما اجملنا بلحظات انواع التعاسه ومن شي صغير تتفتح الدنيا بوجهنا XP

    (;゚Д゚) !!!!
    متتتى كتبت كل هذا !!!!
    اخذت راحتي بزياده ..دهووور مرت من اخر مره كتبت بهالطريقه! الكلام معك سهل :)
    يختي بضغط على اضافه تعليق قبل اقرا وش انا كتبت واستحي على وجهي ( وجه مغطي وجهه بيدينه )

  6. يااااااه ! ماشاء الله عليكِ !!
    تخصصك علم نفس و إلا علم نفس :P
    جد جد كأنك تحسين فيني و الله !

    خصوصاً يوم قلتي هل انا أتوقع تكون سنتي الأخيرة مختلفة ؟
    ايه و مبين من التدوينة اللي كتبتها حقت بداية العام !
    كنت واعدة نفسي إنّها تكون من أفضل السنوات و أنبسط و أفلها :/
    بس للأسف انعكست المقاييس جدّن !
    لدرجة الشهر الأول من الدراسة أحسني ماعشته ! ما أذكر منه شي أبد !
    ما أذكر السوالف اللي قالوها البنات و يوم يسألوني عنها بعدين ! أقولهم متى قلتوا هالكلام ؟
    أختي طلبت أشياء مني و وافقت أعطيها اللي تبيه ! بعد ما رجعت لوعيي أقولها من سمح لك تاخذينها !
    و شوي أسوي محاكمة حيّة ببيتنا XDD

    فعلاً حسبتها بتكون غير من ناحيَة كل شي !
    من ناحية الدكاترة ! البنات ! الدوامات ! : (
    بس قلت في نفسي إنها صدمة طبيعية يعني وش أرجي من الجامعة بالله !
    بس اللي ما توقعته إنّ هالشي يؤثر على نفسيتي لهالدرجة *___*
    يوم سمعتها منك حسيتني استوعبت إن فعلاً هالشي مضايقني :”(

    و قصّة العبقري :”) ياعزتي له بس ق1 ياهو عنده عزيمة و إصرار و كلوو :”)
    بما إننا في إجازة فما أحس بذيك المشاعر اتجاه الدراسة و لا أقدر أنميها :/
    بس جدياً أحسني بمشيها زي ما تمشي :/ يعني اللي يجي حياه الله
    و اللي بيروح معاه الله :/ و اللي يبي يتهاوش برضو حياه الله :/
    ما عندي مشاكل أبدن أحسها خربت :/

    طبعاً لأني بإجازة أقول هالكلام ! بس يوم أواجه الواقع راح تتغير نظرتي XD اعرفني XD

    تشبّع :”( حشو حشو حشو :”( مجتمع ممل و روتيني :”(
    اكره يوم أعلق ع المجمتع إنه مو عاجبني و يجون ناس و يقولون عني إني حالة شاذة عن هالمجتمع :”(
    اللي حسب رأيهم المجتمع البيرفكت الذي مفيش زيّو :”(

    شكراً والز على هالكلام الحكيم و الجميل و اللي أفادني حقيقة ق1
    و دام السالفة تحتاج تفكير و فعلاً بدأت أفكر بالموضوع و أحاول أتعايش و أتكيّف مع هالوضع
    فإن شاء الله محلولة : )

    و أبد تعليقك رهيب ، اللي بتجيهم حالة التخرج يبيلهم يشيكون عليه ق1
    الله يجزاك خير يالغلا ق1ق1

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s