سَوداويّة

سَوْدَاوِيٌ !

يمكن مُصطلح طبيعي نسمعه قبل الامتحانَات !

بس اليُوم مرّت عليّ أشيَاء سوداويّة ! أخس من الامتحانات بالنسبَة لي !

 

من يُوم صحيت من النّوم لساعتكم ذي و أنا أنتقل من خبر سوادوي لفيلم سودَاوي

لحالات سوداويّة !

 

/

 

اليُوم و كمحَاولة لترفيه نفسي لآخر لحظة قبل ماأبدأ أذاكر بكرا أو بعده

حاولت أمتّع نفسي و أشوف لي دراما كوريّة تضحكني

شيكت على الدرامات الجديدة اللي بالجهَاز لقيتني مشطبتها كلها تقريباً

لفيت ع الهاردسكات و تذكرت دراما قديمة اسمها “She is Ninteen

بطلها الجميل يون كي سانق ق1

 

توني أشوف الحلقة الأولى طرى علي طاري غريب !

البطلة ذي من أوول ماشفتها :/ يعني لي فترة مهيب قصيرة و أنا أتابع الدرامات الكورية

صح ماأعرف ممثلين كثيرين بس ع الأقل اللي يمرون علي دايم أتابعهم و أشوف أخبارهم

قلت مالك بالطويلة روحي شوفي برفايلها بالدراما ويكي

 

https://i1.wp.com/img3.lln.crunchyroll.com/i/spire2/05062008/a/2/2/4/a224290279eec0_full.jpg

Jeong Da Bin

 

انصدمت إنها طلعت منتحرة من بداية الـ2007 ! بسبب حالة اكتئاب جاتها :/

و دورت شوي حول الخبر ، لقيت إنها كانت تمر بحالة اكتئاب ملحوظة بس الضعيفة محد انتبه عليها :/

— هذي نهاية الحياة الغربية الواحد يعيش في بيت لحاله و محد حوله :/ غصب ينتحر

المهم آخر شي كتبته بصفحتها الشخصية بلوق بعنوان Finished و قالت إنها فقدت هويتها

و تحس إنها بتموت قريب :/

بعدها لقوها منتحرة بحمام -وانتوا بكرامة- ببيت بوي فرندها :/ و العياذ بالله

 

طبعاً قمة السوداوية بتجيك يوم تتصبّح على خبر زي كذا !

بالذات لـ الناس الفاضين اللي زيي :/

أبد تركت كل شي بيدي و انسدحت و قعدت أنسج لي قصة من بداية ماجاها الاكتئاب لين آخر لحظة قبل ماتعلق نفسها و تموت !

حتى الله يجزاني خير حاولت أكون دقيقة في الكثير من التفاصيل ! لين فقت على نفسي و حسيت إن صلاة الجمعة شوي و تبدأ !

ياخي و تنتحر أنا وش دخلني ! ليه أدوخ نفسي و أقعد أتخيل كل واحد من معارفها كيف بتكون ردّة فعله !

حالة و ربي !!!

 

/

 

طبعاً و كتكملة للخبر أعلاه تذكرت اليابانية اللي انترحت عشان دبسك !

ملاحظين إني ماأعرف شي بالفرق الكورية بس بقدرة قادر عرفت عن سالفة اليابانية اللي انتحرت !

و أبد محد علمني أنا رحت تلقفت و تلقفت و تلقفت لأنفجع بالخبر !

و من الصدمة مادققت و بحثت حولها ! هي مراهقة هي ايش طرى عليها تنتحر يعني بعقلها أي مشكلة في العالم

بتنحل لو انتحرت ! لا و اللي يقهر ليش تنتحرين انتي ! ايش دخلك يعني فان على عيني و على راصي ماله داعي تنتحرين ترا !

ايش استفدتي قوليلي ! الدبسك و للحين متفرقين ! انتي و متي و الله العالم ايش حياتك بعد الموت !

يا الله لا تبلانا بس !

و كنتيجة لتذكري لهالحادثة زادت حالة السوداوية اللي اكتسحتني و قعدت أفكر في هالبنت برضو و سويت لها قصة

لدرجة إني قررت أصير كاتبة سينمائية و أسوي لي فيلم سعودي عن بنت كذا زيي تقعد تتخيل حياة الناس الباقين

و آخر شي يطلع غلط عليها و تاكل تبن XDDDD

 

/

 

و أخيراً  الشي اللي حطمني تقريباً !

أو زي مايقولون القشّة التي قسمت ظهر البعير !

دورت على آخر أفلام يون كي سانق و لقيت له فيلم بـ2009

 

The Executioner

https://i1.wp.com/cdn1.iofferphoto.com/img/item/164/907/905/zezv.jpg

 

أوكي حاطين تصنيفه دراما بس ماجا ببالي إنه كذا !

مشكلتي في الحياة كل شي أشوفه أحط نفسي مكانه ! مدري من قو الحماس و إلا كيف !

 

الفيلم يتكلم عن أحد السجُون الكورية ( معلومة : يقولون هذا أول فيلم كوري يتم تصويره في سجن حقيقي )

و السجّان الجديد اللي يمثّل دوره يون كي سانق Officer Oh

 

و السّجان السومبي ، نسيت اسمه XD

 

 

هالسّومبي ماعنده لعب ! كل المساجين حيوانات ! كلهم مجرد حثالة يُفترض إنهم ما ينولدون أصلاً !

لدرجة مرة كان يعاقب سجين لأنه حاول يهرب بطريقة التهديد ! و لسُوء حظه ما مسكه إلا هالسومبي !

ربطه بالسّجن و جلده جلللد ! ثم طالع بالأوفيسر أوه و قاله امش اجلده !

أوه بطبيعة الحال موظف جديد و لا هو متعود على هالأسلوب ! ماقدر من أول مرة !

فطالعه السّومبي و قاله :

Animals don’t attack those stronger than them
That’s the law of survival

 

ماتصدقُون قد ايش تنّحت ! شخصيته قويّة جداً ! ممكن يسوّي أيّ شي بأي مجرم يستهبل أو يسوي حركات نصّ كم !

في الأخير السجين قام يتلفّظ على أوه و قلب عليه و صار رجّال و جلده لين خلاه يعض الأرض XD

بعدها صار هو و السّومبي ربع و صار السّومبي يعلمه كيف يتعامل مع المُجرمين و أوه يعلمه كيف يضبط عمره بالمواعيد المدبرة خخخخخ

 

و برضو من مقولات السّومبي اللي تفجع !

They’re not people
They’re trash
They should never have been born

 

في نهايَة الفيلم راح يبان ليه هالسّومبي يحقد كل هالحقد ع السّجناء و أصحاب الجرائم !

 

و تستمر قصّة الفيلم ، بإن قاتل متسلسل مسجون عندهم ، الشعب و الإعلام يطالبُون بإعدامه بأقصى سرعَة !

و بسبب هالمُجرم تجيهم قرارات عُليا بتنفيذ 3 عمليّات إعدام !

مع العلم إن سجنهُم له 12 سنة ماسوى ولا عمليّة إعدام !

 

هنا يبدأ الأكشن بالفيلم ! من هنا بدأ قلبي يعورني !

يا الله قد ايش قعدت أحمَد ربّي إني مو سجّانة ! و قاعدة أدعي ربي إنه يثبتني و لا أصير مُجرمة بيوم من الأيّام !

و القارئين يارب :”)

 

النهاية سوداويّة ! فيه مناظر تقشر لها الأبدان !

في أشيَاء تخليك تراجعين نفسك ! الحين من الصّح ! السّومبي يوم إنه يعامل السّجناء على إنهم حيوانات و أقل !

و إلا رئيس السّجن اللي تصادق مع سجين له عشرين سنة بالسّجن و اضطر يحضر عملية إعدامه “من أشد المواقف تأثيراً بالفيلم”

و إلا يُوم تلقون مُجرم سايكُو ! مُجرم مختل ! يا الله ! الله يحفظنا من هالأشكال ! هذولي اللي ينخاف منهم و الله !!

مع إنّ الفيلم فيه برُود في بعض المواقف ، و ايه أظن فيه 3 أو أكثر مواقف بايخة مصخرة مال أمها داعي ! جابتلي قشعريرة <_<“

 

يمكن أعطيه 8 من 10 : )

و يُفترض أقول إن يون كي سانق هو أحسن من ممثّل دامني شايفة الفيلم عشانه XD

بس الحق ينقال السّومبي تمثيله رععب !!! و الله كأنه قدامي من كثر ماهو حابك الدّور !

رئيس السّجن ! هالممثل رهيب من أيّام Hello Miss ! تحسّونه مايمثّل ! و يمكن طبقة صوته معطيته جَو XD

المشهد يُوم شوي و يصيح على أوه يقوله بكرا لا تجي عمليّة الإعدام ! اكذب علينا قلنا إنك مريض قلنا أيّ شي

بس لا تجي عمليّة الإعدام :”( يا الله قلبي بدأ يعورني مرة ثانية :”(

 

و هنَا التريلر

 

– الاختبارات أهون من كل ذا خصوصاً لو سويتوا فيها و قعدتوا تتخيلون كل شي كأنكم معهم –

-فبعد هالبلوق ، منجد ،  أهلاً أيّتها الاختبارات –

XD

3 thoughts on “سَوداويّة

  1. مثلي تمام التمام لا قالولي قصص تصفق الوجه وتجيب الهم عن احد مات او شي نفس كذا
    لازم امسك نفسي ليش سوت كذا وش رده فعل الي شافوها تموت وش تلقين هذا وهذا وهذا الخخخ
    واتسائل انا وش دخلني :) بالنسبه للفيلم ناخذ مساحه اتكلم فيها عن نفسي
    انا انسانه يوم كان عمري 17 كنت امووووووت عالكورين واحفظ اساميهم برامجهم كل شي كلشي
    واخق واحلم وحاله وعقب ماشفت الي مات والي يتلفع كرهت كوريا كرهت حضارتهم كرهت كل شي
    وصرت ما اقدر اتابع دراما من كثر حرف الجيم بلغتهم ض1 بس هذا مايعني ان الدراما شي مب حلو
    ولا انكر اني عشقتها بيوم نرجع لموضوعك بالنسبه للفيلم جا كلامك عنه بوقته
    اقسم ذاك اليوم خلصت كل انمي rainbow واخر حلقه قبل لا اروح الجامعه ياحلاللاتي
    الانمي هذا رهيييييييييب وانا تكلمت عنه بالاقلاع امس الي هو الصراحه اتقشعر يوم جو يقعد يصيح
    ويقول حنا حثاله حنا مايسمح لنا نحلم كله من مأمور السجن الي كان يلفعهم ويوديهم للدكتور المنحرف :(
    ولا يوم يقول باريموتو حنا ما اخترنا اننا نكون حثاله اااه بس كم مره صحت وكم وكم مو كني مسكت خط !! الي بقوله هو اشين شي لا مسكتيلك شي يعنني بسوي عواطف وبجرب شي جديد وتلقفين فيه وسوالك سوداويه غير طبيعيه وخلاك تفكرين وتفكرين وتفكرين وخرب عيشتك :(
    ومشكووره عالموضوع وكل شي ق1ق1ق1 استمري ياففتاه ض1

  2. اووه نسيت اهم شي الاختبارات ماتسوى شي
    الاختبارات اهون من ان احد اقاربك يدخلون السجن
    الاختبارات اهون من انه يموت احد حبيتيه
    الاختبارات اهون من التشرد
    الاختبارات اهون من التحرش الي صاير بمصر
    ما اقول غير الله يكون بعون كل المسلمين << سرقت اغنيه محمد عبدو خخخخ
    واللله يعيننا جميعا وسوري عالاطاله

  3. خخخخخخ لحظة لحظة جي الحين ليش كرهتي دراماتهم XD
    مع إنها حرية شخصية ، عن نفسي أشوف اللي يتابعون البرامج و المغنين و الفرق الكورية قاعدين يضيعون وقتهم على ولا شي
    بس الدراما أحسها عادي أصلاً اهتمامي بالممثل لا يتعدى تمثيله بالدرامات
    و علاقتي فيه تقف عند الدراما ويكي D:
    يعني لك دراما أهلاً و سهلاً بتابعك ، بس عنده فرقة و أتابعهم و أتابع برامجهم و أعرف حياته اليومية ايش أكل و كيف نام :/
    لأ ، سوري يعني أحس بقلل من قيمة حياتي لأني جالسة أهملها و أنا أتابع حياة ناس حتى ماراح أقابلهم :/

    فارجعي لدراماتهم بس اتركي عنك حياتهم D:

    رينبُو :”( هالشي ماودي أشوفه الحين ، بخلي يوم يجيني المود التعيس و أشوفه :”(
    شفت الأولى و كانت حزن و عذاب :”( مستحيل أتخيل نفسي مكانهم مستحيل :”( يا الله لا تكتبها علينا :”(

    خخخخ أخيراً عرف عضويتكِ بالإقلاع XD ليه ماتشاركين كثير : ) نبي نشوفك مرتزة بالكافيه 24/7 <~ اللي يسمع تشارك لها 3 أسابيع ماوطوطت هناك XD

    الرد الثاني ، ايه و الله صادقة <~ اندمجوا XDDDD

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s