مافي شي يجي بدون شغل ! #سواليف

العنوان يوصف كل شي أبي أقوله الحين !

 

https://i2.wp.com/img835.imageshack.us/img835/3894/workc.png

 

استنتاجات أو خلنا نقول “مسلمات” نعرفها من يومنا بزارين و مع ذلك توي الحين بعد ما راح من العمر الكثير استوعبتها !

أو خلنا نقول استنتجتها ! فعقلي الجميل مسحها من قاموسه نهائي و كأنها ما تعنيه !

 

دايم نسمع الأمثال و أبيات الشعر غير القصص اللي من سيرة الرسول عليه السلام اللي تدل على إن كل شي يحتاج تشتغل عشانه !

و ما نيل المطالب بالتمنى ، و لكن تؤخذ الدنيا غلابا !

من جد وجد و من زرع حصد و من سار على الدرب وصل !

قصة الرجل اللي جا يشحذ من عند النبي و خلاه يشتغل حطاب !

أشياء كثيييير حبيت أجيب مثال لكل واحد منهم

 

للأسف ، أنا وحدة من يوم ربي خلقني و أنا متسدحة و أبي كل شي يجيني لين عندي !

أوكي أكيد عندي تجارب ، بس أبو يوم يومين ما أطول :/

التركيز عندي شوي لكم عليه ، ممكن في الساعة الوحدة أسوي 10 نشاطات مختلفة و آخر شي أتركها كلها !

اليوم مثلاً أكون متحمسة بجنون عشان أتعلم كيف أرسم الجسم ! أجلس أتعلم لين أنام !

أصحى اليوم الثاني و ألقى نفسي مسوية فورمات لكل شي فكرت فيه أمس و أبدأ أفكر من جديد !

ايش لازم أسوي اليوم ؟ و يلا نبدأ مشروع جديد تماماً ، و هالمشروع يختفي كلياً من يوم أنام !

عندي قدرة عجيبة على نسيان كل شي يوم أنام ! حتى لو نمت و أنا أبكي من شي زعلني أصحى من النوم كأن شي ما صار !

مرة تهاوشت مع أختي و نويت أقاطعها كم يوم عشان تتعدل ، بس من الخساسة نمت و صحيت و تكلمت معاها و تتريقنا و ضحكنا

و بعد ما مر نص اليوم تذكرت إني زعلانة منها =___= خلاص ما يمديني أرجع أسوي نفسي زعلانة و أصلاً خلاص الطاقة حقت الزعل راحت =___=

كل يوم شي جديد ، كل يوم بداية جديدة و المشاريع المسكينة اللي راحت ممكن تطول لين ترجع =__= من شهر و طالع =__=

 

هالشي كان مسبب لي أزمة ! الأزمة إنه أصلاً أنسى إنه مسبب لي أزمة ! #زهايمر =__=

طيب ، بعد هالمعاناة تعلمت أكتب اللي أفكر فيه ! طالما عندي هالكمية من الأفكار خليني اكتبها عشان أقيدها !

و فعلاً بديت مشوار الكتابة و خصصت لي دفتر ، دفترين ، 3 دفاتر ، 4 دفاتر !

متصورين عندي 4 دفاتر ؟ و كلها فاضية إلا واحد فيه كم صفحة ؟ طيب تدرون ليه ؟

لأني شريت أحلى الدفاتر بالمكتبة و كلها فوق 20 ريال يوم أجي أبي أكتب فيها أقعد أتمقل لين أنسى أنا ايش أبغى أكتب أساساً =__=

و على هالحالة لين تكومت عندي دفاتر كثيرة و كلها فاضية و صرت يوم أروح المكتبة أمي تهزئني عشان لسه أبي أشتري دفاتر جديدة غالية =__=

 

طيب يوم وصلت لهالمشكلة قلت ما يبيلها هالدفاتر نقمة أكثر منها نعمة و رحت سرقت دفتر من دفاتر أخواني ذيك أم ريالين

و يا سبحان الله ! تصدقون إن الدفتر على وشك يخلص مع إنه ماكمل شهرين ؟

و كتبت فيه أشياء و أفكار أحيان أجلس ساعة أقرأ فيه من الوناسة خخخ و كل ما أقراه أحسني أول مرة أقرأ ذا الأفكار

“الله يقلع إبليسي كيف جاتني ذا الفكرة خخخخخخ” و حلونا عاد ما أفكه إلا و انا مخلصته خخخ

 

طيب طلعت مشكلة جديدة ! صرت معاد اكتب فيه ! لماذا يا أنا !

الدفتر مع الكتابات الكثيرة و الاستخدام صار شكله بشع : ( أبي دفتر جديد : ( #تبن

و للحين ما حليت هالمشكلة =__= بروح أسرق دفتر ثاني من عند أخواني =__= يا رب بقي عندهم بس =__=

 

طيب نرجع لموضوعنا ! كل اللي استفدناه من اللي فوق إنه كل إنسان عنده طقوس خاصة فيه عشان يخطط و يرتب جدوله و أفكاره !

مهما كان مزاجك صعب *و ما ظنتي بيجي شي عند مزاجي الخسيس* إلا ماتلقى لك طريقة تخليك تكتب و تتابع أفكارك اليومية و مخططاتك على المدى القريب و البعيد

 

طيب ! كيف قدرت أركز على أشياء معينة لابد إني أسويها كل يوم ؟

مثلاً الرسم ! الرسم ؟ لا لا ذا عملية لا إرادية بالنسبة لي ماظنتي يحتاج تخطيط ×__×

طيب خلونا نقول التدريب على التلوين مثلاً بما إنها وحدة من الأشياء اللي مسببتلي أزمة ض1

صارت عندي عادة كل يوم لازم أركز على رسمات فنانين أو خلفيات الناس بتويتر أو رمزياتهم أو حتى المناظر اليومية حوليني

أصلاً يوم تحاول تركز على شي معين و تستمر على هالشي سبحان الله قوة التركيز عندك ترتفع و شوي شوي تلاحظ إنك بديت تنتبه لأشياء ماكنت تنتبه لها قبل

مثلاً تأثير الإضاءة على الأجسام ! شي مذهل يوم تجيب الشي تحت إضاءة صناعية أو تحت أشعة الشمس ! تختلف الألوان بشكل كبير !

أو حتى الناس تحت الإضاءات ! في العروس مع ذيك الإضاءات الصفراء يقلبون قلبة بنت لذينا مع المكياج و الحركات تحسبينها كائن ثاني XD

 

هالاشياء اللي تبي تركز عليها أو تسويها دايم يفضل تحط شي حولينك يذكرك فيها !

شوفوا هالفيديو الجميل : )

 

بالنسبة لي انا حطيت قدامي لوحة اسمها “لوحة الرؤية” أخذت فكرتها من فيلم “ذا سيكرت”

الفكرة باختصار إنك تجيب لوحة و تحط فيها صور للأشياء اللي انت تبي توصل لها أو انت تبيها و تخليها بمكان دايم تشوفها فيه !

فعلاً جبت فلين و عشان أخليها ملفتة للنظر جلدت الفلين بتجليد أحمر ! دخلت قوقل إيمج و جمعت صور للأشياء اللي أبيها :”)

طبعتها و رتبتها على اللوحة و كل يوم أشوفها :”) أقدر أقول إنها تخليك تتذكر كل يوم إنك تبي تصير زي هذولي : )

حتى أنا اللي أفرمت كل معلوماتي لا جيت أنام صرت كل يوم أتذكر أنا ايش أبي أسوي ، انا ايش أبي أصير !

بالمرة أنصحكم تحملون فيلم السر : ) جداً رائع جداً ملهم جداً جميل ، من يوم علمتني عنه أبرار و تفكيري متغير كثير ق1

 

طبعاً الثرثرة اللي فوق كلها مجرد مقبلات للشغل و إلا ذي و لا شي ض1

هذا سلمكم الله لازم لازم تحطون لكم أهداف ، رؤية ، رسالة .. عشان تعرفون انتوا وش تبون ، و عشان تسيرون حياتكم زي ماتبون

أقروا هالمقالة الجميلة أتوقع راح تعطيكم نظرة شاملة حول هالشي : ) برضو هذي مرة مفيدة : )

 

طيب طيب !

بعد ما حددنا اهدافنا ، و عرفنا احنا وش نبي بالضبط ، و سوينا لنا مخطط نمشي عليه عشان نوصل لحلمنا الكبير

وش بقى ؟

بقي إنك تتلحلح و تدمر الكسل اللي ما راح ينفعك و تتوكل على الله و تبدأ !

مو بس تبدأ ! لأ ! تبدأ و تستمر !

دايم يقولون البداية أهم نقطة ! بس صدقوني مو دايم !

أنا إنسانة أبدأ و لا علي من أحد ! بس ما يدمرني إلا إني ما أكمل !

مدري أظن عقلي الجميل بعد ما يشتغل كم ساعة يزعل و يكور و يقول بلاها يا نتيجة فورية يا مانبي شي :/

و يجي النوم يكمل الناقص :/ #حالات

 

 

كل المبدعين اللي حولينا هم ناس تعبوا و جاهدوا و حاولوا و فشلوا و قاموا عشان يوصلون للمرحلة اللي هم فيها !

عشان كذا محد أحسن من أحد ! زي ما هو قدر انت تقدر و أنا أقدر و هم يقدرون ! بس الفرق في اللي يفكر و يخطط و يحط و يشيل !

و اللي يتسدحون خلهم في عالمهم لين يقومون يوم و يلقون كل اللي حولينهم منشغلين عنهم بأشياء أكبر من التسدح و اللعب و الفلة !

 

– خخخ مدري ليه أحسني أكتب و أنا معصبة XDDD

6 thoughts on “مافي شي يجي بدون شغل ! #سواليف

  1. كالعاده طاقه حماسيه غير مُنتهيه :$
    وأشاركك بهذا المبدأ، طالما قررنا أن نتغير علينا أن نخطو الخطوة الأولى ولا نتوقف في منتصف الطريق لأن هذا يعني عودتنا من جديد لنقطة الصفر !
    الإستمرار سُر النجاح : )

    • “الإستمرار سُر النجاح : )”
      الله يسهّل لنا و تصير صفة “الاستمراريّة” تمشي بعروقنا مشي 3>
      مجرّد طلتكِ هنا تضفي هالات طاقة لا نهائيّة 3> ماننحرمشي 3>

  2. *__* فيافي
    اعترفي, هل عندك قدرة تخليك تقرأين عقول الناس وافكارهم XD
    أكثر من شغله تتكلمين عنها وأحسك تتكلمين عني *وجه مرتبك*
    نبدأ بشو ولا بشو

    عندنا عدم استيعاب للأمثال والحكم الي نسمعها من يوم كنا صغار
    حتى الأحاديث والآيات
    تحسين يبي لنا إعادة دراسه وقراءه لكل شيء نتعلمه عشان نستوعب عمق وجمال المعاني الي تتخبى وراها الأقوال هذي

    تعودنا نكررها بشكل رتيب بدون تطبيق ولا تأمل جيّد
    لحد مافقدت قيمتها مع الوقت .__.

    ياحبيبتي مشكلتك مع الدفاتر هي نفسها مشكلتي
    قبل كم يوم أتكلم مع وحده من البنات عن اني أكره الدفتر الي أكتب فيه بسبب الفوضى والـ (شخاميط) الي خربت شكله ميت1

    عندي 3 دفاتر جديده وحده صغير تبع يوميات
    الثاني جامعي كبير مره والثالث غلافه أسود والفواصل ملونه وعاجبتني جدا كلها
    وليومك ما لمستها لها أكثر من سنة يمه7
    وش أنتظر؟ مدري لكن مثل ماقلتي ما ابي أخرب شكلها بفوضى الافكار خاصه انو عندي نوتات صغيره ودفتر كبير مليانه تقريبا فل
    *مافكرت من قبل اني أسرق من اخواني شي XD لأني قلق لازم شيء جديد*
    ونفس المشكله مع الأقلام سواء تلوين خشبي او أقلام كتابه ملونه .____.
    أجلس مده ما أستخدمها اتأمل جمالها ههههههههههههه
    وماكانت عندي شجاعه أعترف XDD شكراً للتدوينه خليتيني أتكلم عن شيء مو حلو فيني $:

    الأفكار نفس الحكاية.. ابدأ بحثي وأتحمس مع شغله يوم كامل وأجمع كل المصادر الي ممكن أعتمد عليها في معرفة الفكره/ الموضوع الي انا مهتمه فيه واحيانا تلاقيني نزلت فيديوهات وملفات
    ومن بكرا انساها ويروح اهتمامي لشيء ثاني ):
    مع حرصي على متابعة الاهتمام ومشاهدة الملفات وقراءة الكتب للموضوع لكن ما اقدر ابدأ بشي جديد يشد انتباهي

    يرجع السبب أحيانا لأن وقتي مفتوح عند الجهاز فـ لما أجلس يضيع وقتي وانا أتسلى او أتنح بسبب التفكير بكثرة الأشياء الي راح أطلع عليها وينزحم راسي وأفضل أكنسل كل شيء عشان ما أتشتت

    فـ لو كان وقتي محدد كنت باجتهد وأستغل الوقت الي أجلس فيه زين

    لما أبعد عن الجهاز بيكون في مجال للأفكار انها تطلع وتترتب بعكس لما اقول أي وقت اجلس فيه ع الجهاز أسجل الفكره هذي وأتكلم عن رأيي بكذا (وهنا المجال مفتوح لأن الجهاز والانترنت مجالها مفتوح بأي وقت= تسويف وتأجيل)

    وهذا الي يخليني أتضايق من انو الوقت يضيع مني بدون استغلال وانا اتفرج عليه :/

    لما أكتب وأخلص أتعجب كيف كتبت الكلام هذا ووقفتي عند الكلام وتكراري له يخليني نوعا ما أتعطل عن الابداع بوقت قريب منه
    اما بسبب اني أقارن كتابتي بالي راح! او لأني للحين أفكر بالي كتبته, احيانا انتظار الرأي المقابل يعيقني عن المتابعة
    على حسب المزاج الي اكون فيه وقتها XD

    فيافي ^-^ ايتها الفتاة الجميلة
    أحمد ربي وأشكره اني التقيت فيك وعرفتك حب1
    وشكراً لـ رين الي وصلتني لك عن طريق مدونتها وه1
    ممتنه كثير لمعرفتك وأتمنى اكون مصدر فايده ومساعده لك مثل ما انتي مصدر فائده ومساعده لي n______n

    < (على الرد القصير هذا وش رايك تقطين معها بالمدونه)
    $:

    • أومق *___* يختي شوي و أدخل راصي بالشاشة و أنا أحلف و أقول “نفس الشي نفس الشي” !
      بس أقولك شي يخلينا نتحمس شوي :$
      عندي كتاب أقراه حالياً اسمه “صناعة الأفكار المبتكرة”
      و ببداية الكتاب يعطيك اختبار تسوينه مع نفسك و منه يطلع لك انتي مبتكرة و أفكار إبداعية و إلا لأ و وش تحتاجين !
      عاد تدرين إن المبتكرين عندهم نقاط ضعف تميّزهم هم بعد ! و منها هالتشتت و التغيير الشنيع !
      يختي شوي و أخم نفسي يوم قريت هالنقطة :$ مع إنه بعد الاختبار يوضح لك نقاط القوة و نقاط الضعف
      و هالشي مخلينه مع نقاط الضعف إلا إنه يكفيني إنه من صفات المبتكرين :$ يعني فينا خير إن شاء الله خخخخ
      ودي أكتب تدوينة كاملة عن هالفصل اللي قريته فيه عشان الناس تتحمس و تخق مع نفسها :$
      لو تشوفين وجهي وقتها شوي و أتشقق خخخخخخ

      و ع الدفاتر تراني بعد ما اعترفت بهالشي أمام الملأ صرت حاقدة على دفاتري حقد <__

  3. أوافق الصديقة هايدي في أنك تقرأين الأفكار !
    XD ، انا ايضاً كنت قد فكرت في الموضوع منذ ايام قلييله فقط ، وايضاً فكرت في موضوع جدولة الرسم !
    ثم قلت العبارة ذاتها ” الرسم شي مزاجي متى ما ابغا اسويه ما يتجدول ! ” هههههه يااه سبحان الله ، ما جعلني افكر
    في عمل جدولٍ يومي هو ضيق الوقت اولاً > ضيق الوقت بسبب الجلوس المطول على الحاسب المحمول خخخ
    و جهلي بما افعله في اوقات فراغي ثانياً ، و لقد بدأت جزئياً بتطبيق هذا الجدول الذي يتضمن و قتاً للرياضه ايضاً
    فأنا اريد ان اخسر بعض الوزن ب _ ب ، و هذا يحتاج الى بذل مجهود ، و بالفعل خصوصاً في موضوع خسارة الوزن تتطبق قاعدة ” لكل مجتهدٍ نصيب ” خخخخخخخ ، فمنذ ششهووور و انا افكر في الموضوع ، لكني لم احاول محاولة جادة الا هذه المره
    فأنا ايضاً مصابةٌ بمتلازمة ” اللااستمرارية ” للأسف ، و هذه لا تعالج الا بالتنظيم و ترتيب الوقت كما لاحظت ، و الرغبة الصادقه في تحقيق الهدف ايضاً ، كما ان كتابة الاهداف على ورقة تجعلك تحقق 90% مما يتضمنه هدفك !! ، لذا على كلٍ من ان يكون له دفتر خاص كدفترك ، يكتب فيه كل شيئ ، و انا اايد كتابة اليوميات في الواقع ، ليس اليوميات السطحيه ! ماذا فعلت اين ذهبت ناننانناانا الخ … ، لا بل اليوميات المبنية على الاسئلة التالية : مالذي تعلمته اليوم ؟ ، ماذا اود ان اتعلم غداَ ؟ ، مالذي افكر فيه حالياً ؟ مالذي فكرت في فترات يومي المختلف ؟ ماذا قرأت ؟ و غيرها الكثير ، اذا قمت بتدوين معلومات يومك اللتي تجيب على تلك الاسئله و حددت اهدافك ، فإن هذا سيكون مفيداً للغاية ، و سيحفزك على الانجاز أكثر و أكثر و أكثثر بكثير ، و الاهم من هذا كله أحب ما تفعل لتستطيع الاستمرار ، على فكرة ، كونك من الاشخاص الذين يجيدون القيام بعدة اشياء مع بعضها امر جيد للغاية اتعلمين ؟! ، لقد كنت اظنه عيباً في نفسي ، ولكن بقراءة معلوماتٍ مختلفةٍ عن هذا اتضح لي ان الاشخاص من هذه النوعية هم الأقدر على النجاح و ذلك لأنهم يستغلون الوقت بشكلٍ افضل و ينجزون اكثر ” اذا توفر التركيز ” عند الانجاز ،اعتذر عن الاطاله و لكن الموضوع مهم بالنسبة لي خخ ، و اشكرك كثيراً جداً جداً على طرحه جزاك الله خيراً و احبك و نفع بك و بنا الاسلام و المسلمين ، اللهم امين .

    • عجبتني فكرة اليوميات اللي فيها أسئلة تجاوبين عليها أحسها تخليك تفكرين وش صار وش ماصار على جدولتك و شغلك :$
      خخخخ وش فايدة إنك تسوين عشرطعشر شي و ماتنجزين منها شي :$ هي حلوة لو الوالحد يستمر للنهاية أكيد بيصير مبسوط من نفسه
      ومن إنجازاته بس لا صار يبدأ و لا ينهي فالأفضل يصير إنسان عادي و يسوي أشغاله بالترتيب واحد ورى الثاني :/
      حبيت تعليقك حسيتك نبهتيني على كم شغلة 3> نورتيني ياجميلة 3>

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s