عالم مابعد تويتر

https://i0.wp.com/www.businessesgrow.com/wp-content/uploads/2011/10/twitter-dead.jpg

 

لي فترة أبي أكتب عن التغييرات بعد حذف حسابي بتويتر بس قررت أتمهّل لين أتشبّع بهالمشاعر عشان أكتبها بالملّي XD

في بداية هالشهر الميلادي قررت قرار لا رجعة فيه إني أترك الشبكات الاجتماعيّة لفترة محددة !

قرار واقف ببلعومي من فترة خصوصاً إن انشغالي زاد و صارت عندي مهمّة لازم أخلصها بوقت محدد !

غير إنه و بكل أسف أعترف إن الشبكات الاجتماعية تاكل ثلاث أرباع يومي بدون مبالغة !

 

عند جهازي كومة كتب ! كل كتاب قارية منّه فصل أو فصلين و كل يوم أقول بكملها و مع ذلك يوم تجي ساعة الحساب

نهاية اليوم يوم أحط راسي ع المخدة أكتشف إني ماسويت شي !

“يافيافي بلاش استهبال انتي صاحية لك 17 ساعة وش سويتي فيها؟”

أبد و الله ! لفلفة بقوقل و كم لفة بالإقلاع أطل على مدونتي و الفورمسبرينق و طبعاً التكية بتويتر باقي الوقت !

طبعاً بدون ذكر المسلسلات الأمريكية أو الدراما أو الأنمي!

 

حياة تافهة صح :/ ما تشرّف !

لا و ليتني موظفة أو ع الأقل طالبة عشان أقول عندي شي ثاني أسويه !

لا أبد عاطلة :/ وظيفتي أنام و أصحى و أسوي مشاريع تسوّل عند أهلي ! و قعدة ع اللاب !

كل شي أبي أتعلمه و أبي أسويه كل أدواته عندي !

كتب و عندي مكتبة كاملة تحتريني ! رسم يا الله من فضلك ماخليت شي يتعلق فيه ما شريته !

انقليزي مجمعة كل شي ممكن يساعدني من مواقع و كتب توفل و تجارب ناس و تطبيقات و و و ! و طبعاً كلها على رف الانتظار !

رف الانتظار اللي أكلته حياتي الافتراضيّة !

كنت مزلبة كل هالأشياء و أنتظر شي يصحيني مزبوط شي يخليني أترك الكلام و أصير قول و فعل !

 

التدوينات السابقة كان كلامها جميل ! و كنت أطبّقها فعلاً قبل ما أكتبها و مقتنعة فيها ! بس للأسف كان الوقت اللي أخصصه

لـ اللعب و الفلة أكثر من وقت الشغل ! و طبعاً على قد ما تبذل جهدك يجيك نصيبك ! فشي طبيعي الأشياء اللي أبي أتقنها راح تضطر تستنى

وقت أطول لأن حضرتي ما شبعت لعب ! و أنا شوي و أكمل سنة متخرجة و متبطحة و مع ذلك لسه ما شبعت !

 

و الحمدلله أخيراً طلعت لي شغلة تخليني أضطر غصباً علي أقرر قرار مصيري !

يا أنجز هالمهمّة ! يا أكمّل حياتي في اللعب و اللعب و اللعب إلى أن يشاء الله !

و لأول مرة أقرر قرار صارم و أشرع في تنفيذه على طول بدون تردد و تبريرات >: )

حذفت حسابي بتويتر ! قفلت صفحة الفورمسبرينق ! قدمت استقالتي من إشراف الإقلاع ! و قفلت صندوق التعليقات بمال !

خلاص الحين وقت الجد !

 

أدري كثير بيقولون “طيب يختي فيه حلول وسط مو لازم تحذفين كل شي!”

دارية و الله دارية : ( تحسبونه قرار سهل فجأة تحذفين كل شي كنتي مرتبطة فيه : (

للأسف من يومي طالبة ابتدائي و أنا إنسانة ما ينفع معي إلا أسلوب “الانسلاخ” عن الشي : (

يعني لو أبي أتركه فلازم أقطعه من جذوره تماماً !

تويتر تعبت و أنا أحاول أقلل تعلقي فيه حذفت تويتاتي بس ما نفع :/ بالعكس و لا كإنه صار شي !

ثم حذفت التطبيق من الآيباد و سجلت خروج بس برضو ما نفع :/ فعرفت إني وحدة ماينفع معها إلا شغل الحذف التام :/

و فعلاً ما عقلت إلا يوم شفت الحساب محذوف تماماً خخخ

 

باقي الشبكات الاجتماعية تعلقي فيها ما كان بقوة تويتر صح أثرت على روتين يومي بس مرة خففت علي :”)

و كنتايج لكل هاللي صار بكتب لكم الإيجابيّات و السلبيّات لمثل هالخطوة !

 

 

الإيجابيّات :

-وقت كبيييييييييير للإنجاز و الشغل

-تركيز أعلى من المعتاد لأنه مافيه شي يشغل بالك و لا فيه أشياء تنتظرينها و لا فيه أحد تتابعينه

-تقل قعدتك على اللاب تلقائياً و تدريجياً

-تنصرفين لشغل وقتك بأشياء ثانية و غالباً تكون الكتب المسكينة المزلبة جمب اللاب

– يوم تكون عندك شغلة مهمة و محددة راح تنجزينها بضمير لأن ماعندك غيرها

-راحلة البال

-يوم يجي وقت الحساب ع المخدة آخر الليل راح تنبسطين من نفسك

-راح تطلعين لك عادات جديدة عشان ترتبين روتينك الجديد : )

 

 

السّلبيات :

-سابيشي :””””( منجد أحسّ بالوحدة :”( أصلاً أنا ما حسيت بعطالتي بسبب الناس الجميلين بتويتر فمنجد افتقدتهم كلهم :”(

-ماعاد أعرف الأخبار بسرعة زي أول =__= صرت آخر من يعلم

-افتقدت الهاشتاقات آخر الليل :”( كانت مصدر سعادة بالنسبة لي :”(

-ماعاد فيه أحد ينتقد لي رسماتي :”(

-طبعاً ماعاد فيه مكان أفضفض فيه و أسولف براحتي :”(

 

 

بعد ذا كله منجد هالتجربة اللي أمر فيها حالياً تجربة فريدة و جميلة جداً و مستمتعة فيها على كثر سلبيّاتها

أتمنى إنها تؤتي ثمار ناضجة يوم تخلّص 333>

9 thoughts on “عالم مابعد تويتر

  1. اووووه تعالي بالاحضان
    فقدتك من جددددددددددددددددددد
    اول ماشفت حسابك انحذف ارتعت واسال كاندي لان البحث ماينفع لان كل التويتات اختفت
    من جد لو تشوفين وضعي تضحكين… لان قلقت مااعرف وش صار
    خصوصا اني مع هالدوام انعزلت عن الناس

    بس الايجابيات حلوة خصوصا لما تشوفين نفسك انجزتي… انا مريت بوضعك قبل اشتغل بس مافكرت احذف الحساب سويت تصفيه ع الناس اللي اتتبعهم، قللت لاقصى حد عشان لما ادخل مااقضي وقت طويل، وخصصت اول ساعه باليوم لتويتر والباقي اكمل شغلي
    الى حد ما نفعت شوي فلما توظفت ماحسيت بتعلق كبير بتويتر وانت لاحظت كيف انسحبت بالكامل فجاة مع الشغل
    حتى الحين خذت بلاك بيري وبرضو مااشيك الا مرة باليوم عليه XD

    طمنينا عليك باقرب وقت❤❤❤

  2. حوبيلك و الله 333>
    كنت بكتب قصة حياتي قبل لا أحذف الحساب بس قلت آخرتها بينحذف و محد بيشوف الكلام فماله داعي ض1
    و منجد قومين ع الاختفاء المفاجئ جاتني مسجات ع الإقلاع خلت دمعتي على طريف :”) ربي مايحرمني :”)

    ماشاء الله عليك يمديك تتحكمين بنفسك بتغييرات بسيطة ، سبحان الله كل إنسان له طريقته الخاصة في التعامل مع اللي يواجهه
    أتمنى أصير مرنة أكثر في الحلول ^^

    إن شاء الله قريب برجع طبيعي زي زمان 333> أسعدتيني جداً 333>

  3. انتي اصلا شينة و احنا ما نحبك :(
    ماينفع كذا انسلاخ تام زي ما ضغطتي على نفسك تحذفين كل شي اضغطي عليها تنظمي وقتك و تخلي وقت لشي و وقت لتويتر عالاقل :(

    • شينة ما اختلفنا بس لا تقولين ما نحبك :”( أنا أحبكم :”(
      و الله دارية إنه مو صح الانسلاخ التام بس عطفاً على الظرف اللي أمر فيه أسرع طريقة عشان أركز هي إني أتركه تماماً
      تنظيم الوقت : ( عقدتي في الحياة و لا أظنني راح أتعلمه بين يوم و ليلة : (

  4. التغير- الأنجاز- الأهداف – أصلاح الأخطاء – السلبيات – وش بسوي بحياتي – أني أكون شي عظيم ، هذي الأشياء صارت هاجس شبه يومي لي ،
    مثلج بالضبط النت و عالمي الأفتراضي ياخذ وقت كثير مني بس المشكلة مو منه \”: المشكلة مني !
    أول كنت اضيع وقتي ع الأنمي بشكل جنوني بعدين طحت بالمنتديات و مع الأنميات بنفس الوقت
    بدت تخف حمى الأنميات بعد ٣ سنين و صار تويتر و الفيس بوك ، بالنهاية بعد جلسة مع النفس انتِ ياحصة الي تتهربين و تضيعين وقتج سواء كان فيه تويتر و لا غيره بالنهاية لو ماتغيرتي من الداخل أي عقاب بالدنيا مستحيل يفيد لأنه حتى التأمل ممكن يكون مهرب جيد ،

    للحين ماجالسة أستغل وقتي صح ابداً بل اعتبر مهملة و مسوفة بس حاسة اني بديت اتغير شوي فيه اشياء كنت اسوفها شهور صارت اسبوع بالكثير حاسة أني اتغير بس بعدني ماوصلت للي ابغاه ،

    كلنا نمر بهل الحالة اتخذتي خطوة يافيافي و شلتي كل المشتات مانكر أني زعلت بالبداية و كنتِ تلمحين من أول ع حذف الحساب بس ذاك اليوم كنت بقولج شي و فجأه ادور اليوزر ماهو فيه > التفكير > التركيز > السعادة و الألم > الروابط الذهنية ، جداً رائعة يمكنج شفتي له شي من أول بس بالنسبة لي أول مره و تمنيت احد قالي من قبل ،
    و هنا رابط الأدراك بتلقين الباقي بنفس القناة

    أشوفج ع خير جميلتي بالتوفيق يارب 3>

    • معاكِ حقّ يا حصّة، و ع الأقل انتي يوم تفكرين لسّه قدّامك جامعة و دراسة! فأنا تفكيري راح يكون مختلف عنك لأني حالياً في فترة نقاهة انتقاليّة تماماً يا أكمل دراسات عليا يا أشتغل يا يا يا … و يفترض هالسّنة ما تخلص إلا و عندي أهداف كاملة لباقي حياتي ! لأنه خلاص لازم أبدأ أشتغل على نفسي إذا أبي أصير شي أرضى فيه
      أقدر أقول إني حددت أهدافي و بإذن الله ربي راح ييسرها لي، بس برضو لسّه في بدائل و فيه أشياء ثانية أبي أطور نفسي فيها قبل ما أبدأ بالأشياء الكبيرة
      هذا كله غير الظروف الحياتية اللي تمر بكل إنسان و تاخذ وقته و تفكيره و تجي بدون إنذار
      ففعلاً هالفترة كانت مليانة ظروف -مو ظروف شينة الحمدلله بس أشياء تشغلك بكل حواسك-

      و معاك حقّ المشكلة فينا لأنه لو راح تويتر راح يطلع شي ثاني يشغلك، بس برضو لو ماقدرتي تصلحين المشكلة اللي بينك و بين نفسك ما يمنع إنك تجيبين حلول بديلة حتى لو ماكانت مثاليّة أهم شي تبدئين و بعدها راح تتعلمين و تتعودين و تطلعين حلول تناسبك أكثر و أكثر
      أنا كنت مثلك بالضبط و كنت أقول نفس الكلام ! بس لين متى و أنا أستنى نفسي تتكرم علي و تفهم إنها تضيع وقتها ؟ إذا ما كنت من الناس اللي يقدرون ينظمون وقتهم مو مشكلة أقدر أجيب حل من جهة ثانية حتى لو كان حل يزعجني بس يؤدي المطلوب فليش لأ ! ليش أبرر لنفسي لين تمر شهور و أنا مو حاسّة !

      شكراً ع الفيديو راح أشوفه إن شاء الله 3333>
      أشوفك على سعادة و توفيق يارب 333>

  5. فيافي سينباي :|
    ليش ذا كله ! انا كنت موجودة لما كتبتي آخر تويتة :\
    تقدرين تقولين طرا عليّ كل شي إلا سالفتك ذي !
    لهالدرجة ماكل وقتك :|
    شوفي الصراحة مرات انا أتضايق من قعدتي الطويلة قدام هالحديد ><"
    وافكر انظم وقتي أو اتركه كم يوم !
    اما توصل اسكر صفحتي وكل اكاونتاتي @@" مستحيل أسويها ! مصكا !
    خصوصًا إني ما أحب اقطع الناس اللي تعرفت عليهم وصرت اسولف معهم بشكل يومي او شبه يومي !
    لكن يختي اللي احب اقوله لك ..
    مايندرى وش الظروف اللي تمرين فيها , ولاتصرين شديدة على نفسك :)
    كل شيء راح يجي بـ ( تنظيم الوقت ) !
    لكن بما إنك اخذتي هالقرار الصارم , كان بإمكانك تأخذين قرار اسهل ومايحتاج كل هالعناء والسلبيات !
    وهو المذكور اعلاه بين القوسين :)
    افهم من كلامك في آخر سطرين إنك بترجعين لنا بعد التجربة *3* ؟
    ________________
    وفي النهاية احب اشكرك على هالتدوينة واتمنى لك التوفيق والسعادة في حياتك :)
    وبإذن الله تستفيدين أكثر من وقتك وترجع لنا فيافي *هالة الإبداع*
    <333

    بإنتظارك ^^

    • أهلين هناء 33> منورة ياقميلة 33>
      ماكل وقتي و بس ×__× ما تتصورين قد ايش أنصدم يوم أجي بنام و أنا أحسب الأشياء اللي سويتها خلال يومي !
      كلها تويتر – إقلاع – الفورم – .. …
      حتى أحيان نص الوقت يروح و أنا أقرأ كلام الناس !

      طبعاً أشوفه شي جبّار إني قدرت أسكر الحساب ! من غير ما أقول كل من دخل تويتر راح يفهم مشاعري
      إنه ناس مثلك عندهم نفس اهتماماتك و تحب السوالف معهم و تعتبرهم من أهلك و أخوانك
      يعني إغراء ما بعده إغراء ! مكان يجمع الكثير من المغريات فشي طبيعي الواحد يجلس عليه وقت طويل
      خصوصاً لو كان مزلب ببيتهم و يعتبرونه كائن فضائي و إلا شخص انعزالي آراءه مخالفة لآراء المجتمع
      فماتصدقين قد ايش أنجزت بعد تويتر ! تويتر كان مشتت قوي بالنسبة لي ! ما أكمل أشغالي بس عشان أدخل عليه و أجلس أقرأ بالساعات و آخرتها أنسى أنا أصلاً ايش كنت أسوي ×__× منجد مأساة

      و جات هالظروف و كملتها و اضطريت منجد أقرر قرار حاسم و يناسب الموقف و مالقيت غيره

      معاك حق بنقطة إنه قطع علاقات مع ناس كثير حبيتيهم و حبّوك بس ترا ماشجعني أسكره إلا لأني أدري
      إنه بحول الله لو خلصت مشاغلي يمديني أفتح حساب جديد و أرجع أضيف كل اللي كنت متواصلة معاهم
      يعني تويتر عكس علاقات الدراسة اللي تنقطع من يوم نتخرج أو نبعد عن بعض : ) فهالشي كان مغري ثاني من مغريات تويتر :”)

      -ايه إن شاء الله برجع مرة ثانية 333> بس أخلص قشي 33>
      و نورتيني و الله 333>

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s