Kal Ho Naa Ho

51kdfu8sp1lsl500ss500.jpg (500×500)

كال هو نا هو (يمكن بكرة مايجي) 2003

*وجه أحمر ودموع في كل مكان*

.

بعد الأكاديمية الرمضانيّة الآسيويّة بالإقلاع وتعرفنا على أهل بوليود

أخذت من عندهم كم اقتراح لكم فيلم هندي وكان من ضمنهم ذا :”(

شخصيًا ماأحب مبالغة الهنود وسالفة الرّقص اللي تدخل عرض بنص المشهد سواءً كوميدي أو درامي أو غيره :/

بس عقب هالفيلم، مايحق لي أحرم نفسي من قصص جميلة زي كذا عشان عوامل جانبيّة مثل هذي :”(

.

.

القصّة

القصة تحدث في شوارع نيويورك، المدينة اللي مليانة ناس من كل الأجناس بما فيهم الهنود

بطلة القصة نينا اللي تبدأ تعرفنا بنفسها وبعايلتها المليانة مشاكل :|

أبوها ميّت وأمها وجدتها لأبوها عايشين في نكد ومكافخ وهوشات يوميّة على اللي يسوى واللي مايسوى

خصوصًا حول أختها الصغيرة المتبناة اللي تشوفها الجدة سبب موت (انتحار) ولدها

عندها أخو من ذوي الاحتياجات الخاصة يحب كرة السلة والمفضل عند الجدة كالعادة :/

الولد هو الكل بالكل :/ *حتى الهنود!*

.

صديقتها المفضلة بنت جيرانهم سويتو، هندية دبّية ماتمشي إلا وبيدها وجبة أو آيس تشوكليت بارنيز خخخ

عندها أخت أكبر منها عجوز متصابية تدير مطعم أم نينا تترزز بكل مكان وتحسب كل الشباب ميتين عندها

صديقها الوحيد اللي تفضفض له وتسولف معاه هو روهيت زميلها بحصص الماجستير المسائية

.

حبكة المسلسل كله تبدأ يوم الجدة ترمي كلمتين في العظم على الأم وبنتها المتبناة تخليهم يروحون غرفتهم

ويدعون إن الرب يرسل لهم الملاك اللي راح يغير لهم حياتهم ويجيب لهم السعادة *ويزداد البكاء*

ومن هو هذا الملاك :”(؟

إنه الجار الجديد في الحيّ :”( أمان 33>

tumblr_m8t6nyWDKv1rnqtds.gif (312×174)

(أعتبر بناء شخصيّة أمان أفضل نقطة بالفيلم كلّه)

أمان ولد أخ جارهم اللي جا من الهند هو وأمه بنيّة الزواج حسب مايقول

بدأ يتدخل بحياة نينا وأهلها ويحاول يساعدهم قد مايقدر

إنسان مزعج كلامه كثير إذا دخل مع أحد في نقاش يغلبه يعني يغلبه XD

شخصية ملقوفة بشكل مرعب! بكل مشكلة وبكل سالفة تلقونه طاب معهم وكأنه واحد منهم XD

هالشي يعصّب نينا ويخليها عصبيّة اتجاهه ودايم تطرد فيه وتهاوش أهلها إذا استقبلوه XD

بس مالذي يحصل!

.

.

طيب ليه أمان جا أمريكا مع أمّه؟

من هو حب حياة نينا؟

ليش أمان قاعد يساعدهم؟

اللي يبي يشوف الفيلم لا يقرأ اللي بكتبه عقب هالسطر *على أساس إني ماحرقت عليكم للحين XD*

.

.

أمان

الشاب اللي طلّع نينا من طورها، وقالها حقيقتها بكل صراحة وشفافيّة

“انتي إنسانة غاضبة، نسيتي كيف تبتسمين، يلا براكتس وسوي “ايييه” *يبتسم* إذا تدربتي راح تتذكرين كيف كنتي تبتسمين”

هالمواجهة الصريحة أزعجتها، هالكائن بكبره أزعج حياتها!

يتدخل في مشاكلهم، يتكلم باللي يبي، وحتى لو حاولت تناقشه فهالنقاش عقيم لأنه بيغلبها وبيخليها تعتذر فوقها XD

أمان بدأ يكون علاقة صداقة مع نينا وروهيت، وبدأ يغير طبع نينا شوي شوي لين قدر يخليها تفهم إن الحزن والغضب طول الوقت يدمرها ويحطم حياتها

قدرت تبتسم من جديد بعد انتحار أبوها، وقام مطعمهم من جديد وبدأت أسرتها تتقدم خطوات للأمام

رغم إن هالشاب الجديد مزعج وكريه بس بدت تكن مشاعر له، وبنفس الوقت بدأ صديقها روهيت يكن لها مشاعر خاصّة

.

نينا تبي تعترف بحبها ومن جهة أخرى أمان يعلم روهيت كيف يعترف بحبه

في يوم لقاء روهيت بنينا وبمجرد جلوسها قدامه تعترف (أنا أحب أمان) انصدم، تلعثم، ونصحها تروح وتعترف من دون تأخير

اتصل على أمان وبلّغه قبل ماتوصله نينا :”(

وصلت نينا السعيدة، جلست مع أمان تبي تفاتحه بالموضوع، بس كانت فيه صورة ع الطاولة

صورة لأمان مع وحدة وشكلهم مقربين :”(

“مين هذي يا أمان؟”

“أوه هذي! ماعلمتك معقولة! هذي زوجتي”

انخرست كل الكلمات وانقطع حبل السعادة ومالقت غير إنها تختفي من أمامه

.

“أمان انت تحبها؟”

“أنا ماأحب نينا”

“من قال أصلًا اسم نينا؟”

“أمي.. انتي تدرين البير وغطاه.. تعرفين ايش صار لنينا يوم مات أبوها.. تتوقعين إنها بتعيش طبيعي لو مات لها شخص ثاني؟ أتوقع بتنهبل أصلًا هي مهبولة”

.

تبدأ بعدها خطة الـ6 أيام اللي سواها أمان لروهيت عشان يستحوذ على قلب نينا

tumblr_m83bewM0bi1r4vhzno2_250.gif (250×106)

وكانت خطة ناجحة بكل المقاييس، علاقة الصداقة اللي بينهم تحولت تدريجيًا لحب

بس للأسف نينا درت إن روهيت سوا اللي سواه معها لأن أمان علمه كل شي :”(

ألقت قنابل على مسامع الاثنين (انت ماتحبني انت مجرد تابع لأمان قلك حبني حبيتني قلك سوي كذا سويت)

بس أمان تدخل لأنه مستحيل يخرب خطته اللي تعب وهو يسويها لغرض في نفسه :”(

روهيت عنده نوتة سوداء دايم يكتب فيها أشياء ولايخلي نينا تقرى وش كاتب!

أمان انتزعها منه وبدأ يقرى منها عبارات تدل على حبّه لها وكأنه كاتب هالكلام حتى قبل مايجي أمان :”(

يقرأ من صفحات بيضاء ناصعة :”( *تلطم*

.

.

نينا وروهيت رجعوا لبعض، وتكفل أمان بإقناع عايلة روهيت الغنية بزواج ابنهم ببنت البنجاب

ويقيمون حفلة الخطوبة الرهيبة XD

وهنا تحدث الطامة :”(

بعد الرقص والمناقر لإحياء حفلة الخطوبة يسقط أمان :”(

بس يحاول ويقوم عشان محد ينتبه له :”( كانت وجوه العريسين وأهلهم السعيدة تتقافز قدامه :”( لازم يقوم :”(

بعدها تلقاه أمه بغرفة تعبان وتوديه المستشفى بدون ماتعلم أحد

قلبه الضعيف ماعاد بقيله وقت أكثر من كذا :”(

.

في محل مجوهرات مدري بمول روهيت ونينا يتسوقون لزواجهم ويقابلون البنت اللي بالصورة مع أمان

تسلم عليها نينا وتقولها إنها من طرف أمان وتبدأ تهلي وترحب فيها ثم يجي زوجها اللي أول مرة يشوفونه!

(وين أمان!!؟)

(وليش لازم يكون معي؟)

زوجها (الله يذكره بالخير هو اللي جمعنا وزوجنا :”) كل ماأتذكر إنه يصارع في أيامه الأخيرة أحزن بس كويس إنه عنده أصدقاء زيكم)

:”””( *العالم يتصدّع*

.

أمان يدري إنها درت :”( ويحاول يروحلها عشان يفهمها إنه مايحبها وإنها لازم تتزوج روهيت :”(

“أنا ما أحبّك، ماأحبّك! ليش ماتفهمين!”

“ليش انت تحبني لهالدرجة؟”

“أنا قلت لك إني ماأحبّك”

*نواح وعويل*

.

يكملون زواجهم، رغم كل المشاعر اللي يكنونها لبعض

لأن اللي الحي أبقى من الميّت :”( لأن مهما حاول روهيت يفهّم أمان إنه خدعه وإنه يحبها

فأمان يرد بإنه هو الشخص اللي بيكون معاها :”( “أتمنى لو كنت مكانك” :”(

.

تسوء حالة أمان، وكلهم يجتمعون حولينه يودعونه :”(

وآخر حوار له كان مع روهيت :”(

“بهالحياة نينا صارت لك، بس اوعدني إنها بتكون لي بكل الحيوات القادمة :”(”

“أوعدك” مع سبابتين متقاطعة خلف ظهره :”( *علامة الكذب*

وينتهي الفيلم بظهور نينا وهي عجوز وتحكي أختها الصغيرة عن أمان اللي غير حياتها وأنقذها وخلاها على ماهي عليه الحين :”(

.

.

رأيي بالفيلم

أكثر شي أعجبني حبكة الفيلم+اسمه المرتبط فيها

(يمكن بكرة مايجي) إذا حتى بكرة ماندري بنعيشه وإلا لأ ليش نغم أنفسنا ونفكر بأشياء تعيسة وسيئة؟

ليش مانعيش الوقت اللي معانا طالما هو ملكنا بهاللحظة؟ ليش مانكون سعيدين ومتفائلين؟

كيف إنهم أظهروا إن أمان ملاكهم الحارس، كيف دخل حياتهم وغيرها ثم طلع منها وأثره باقي فيهم ليوم مماتهم :”(

حاجه جميلة بغض النظر عن طريقة سير بعض منعطفات القصة اللي ماعجبتني من ناحية تسلسل الأحداث أو من ناحية الإخراج

السرعة الشنيعة في كيفيّة حدوث الحبّ في حياتهم يخليك تحسّ إنه ممكن تحب أي شخص تحط عينك بعينه XD

الأغاني اللي تدخل عرض وفجأة وتحسسك بالتشويش وتبعدك عن المشهد اللي كنت مندمج معه XD

قدّمت أغلب أغاني الفيلم ورقصهم اللهم أغنيتين وحدة أغنية أمان الأولى حقت التفاؤل

والثانية الأغنية البنجابيّة بحفل خطوبة نينا XD

.

المواقف الكوميدية خفيفة XD خصوصًا مواقف الجدة ومربية روهيت كانتا XDDD برضو أمان ماأنسى حركاته XD

الفيلم جميل أعطيه 7/10 عشان المشاعر الجميلة اللي عشتها فيه 3>

اللي قاهرني نقطة وحدة :”( الحين الهنود كل شي عندهم يجي بالساهل ماقدروا يعيشون الولد ويعطونه قلب جديد يعيش عليه :”(

حسبي الله بس :”(

tumblr_m2jkq0mVVo1qaxdql.gif (300×167)

قود موفي :”( أرشحه للي يقدر يغض الطرف عن الشطحات ويركز بالحبكة :”(

tumblr_m3xs82T7k31ruf3ijo1_r2_500.jpg (500×556)

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s