-سواليف-

أنواع النّقد المتتابعة اللي مريت فيها خلال الرّبع قرن -إلا شوي- اللي عشته بهالدنيا XD

 

-1-
النقد السلبي المدمر (للناقد والمنتقد على حدٍ سواء)

هذا سلمكم الله يومني مراهقة إذا شفت شي ماأعجبني أقطع فيه 
حش وتسفيل من اللي يعجبكم، وماأفكر أبدًا أذكر أي إيجابيّة من إيجابياته حتى
لو انتبهت لها! لأنه من رأيي لو قلت إيجابياته فأنا أطعن برأيي بالأول والأخير 
وبذيك المرحلة إثبات الذات يعتبر الهدف الأسمى والأوحد ولتسقط الحيادية 

المشكلة إني يوم تعديت مرحلة التعصب قابلت ناس كثير أكبر مني على نفس نهجي القديم
ولا هو قصدي أسوي يعنني الفتاة التي نضجت فكريًا  بس جديًا! التعصب لشي
يخليك تنعمي عن كل شي حسن فيه، سواءً نقد عمل أو نقد رأي أو حتى شي
يومي يحصل في حياتك، يحرمك من إمكانية التطوير اللي انت تدور عليها 

قابلت كثيرين إذا شافوني أرسم يقولولي (وش بتستفيدين من هالخرابيش؟ روحي سويلك شي أحسن! عمرك ضاع عالفاضي!)
وإذا قلت لهم (زي ايش مثلًا) قالوا (غسلي الصحون أو قومي اخدمي أمك أو حتى يقولون سوي أي شي إلا هالشي!)
مايقنعونك ولايعطونك بديل ويستمرون في نقدك ع الطالعة والنازلة لين تكرهين عمرك 

في سن مبكر كنت أتأثر كثير بالكلام اللي ينقال لي خصوصًا إنه يجيني من ناس أعتبرهم قدوة لي بمجالات ثانية! النقد لمجرد النقد وليس للإصلاح (نكبة)
وكنت على وشك اعتزال الرسم للأبد! حتى اللغة اليابانية كنت ناوية أتعلمها جديًا من أيام الثانوي! وكسروا مجاديفي لين بطلتها وقريب رجعت لها!
انتقادات تعرقل الشخص ولاتعطيه خيارات ثانية حتى عشان يفكر فيها ويختار 

برضو أذكر أيام ماكنت مشجعة مجنونة  ياإلهي إذا أحد انتقد لاعب بالهلال مستعدة أقوم حرب شعواء وأقطع كل العلاقات معاه خخخ ذكريات شنيعة 
كنت أحس بالخطر أو كأن الشخص تعدى علي شخصيًا! مدري هل هو تعظيم لرأيي أو تعظيم للفريق اللي أشجعه؟ هل أشوف لو جاه انتقاد معناته جاني نفس
الانتقاد لأني اخترتهم وبكذا هذا معناه إن اختياراتي وذوقي زفت؟ مدري ليه ماكنت أستوعب عبارة (لولا اختلاف الأذواق لبارت السّلع) مع إن
هالعبارة كانت تتكرر على مسامعي 24 ساعة يوم أمي تبي تقنعني إن التعصب شين خخخ

هذا طبعًا غير نقد الآخرين للأنمي ويابزرة ياطفلة وين عقلك يوم تشوفين كرتون بزارين 
نفسي أجيب هالفئة وأخليهم يشوفون لو أنمي واحد أنا أختاره لهم ويعطونه فرصة عقبها
بس المشكلة رغم عروضي السخية إلا إنهم مايبون يغيرون آرائهم حتى وهم مايعرفون عنه شي

هالنوعية دايم شعارها (رأيي الصح والباقي غلط) تلقاهم مايتقبلون نقاش
وحتى لو جبت لهم أدلة دامغة محد بيسمعها وبيبلونها ويشربونك مويتها وبيردون عليك بطريقة تخليك تقطع الحوار وتقوم
الأفضل تطنشهم، ياينقدون ويعطونك خيارات ويقنعونك، يايخلون آرائهم لأنفسهم 

يعني من تجربة شخصيّة، يوم كنت متعصبة لو مدري من يجيني والله ماأقتنع خخخخ بس يمكن
كثر الزن يفك اللحام، ولأن عايلتنا دايم ترحب بالنقاشات وياخذون ويعطون معاك بديت أحاول أتقبل، لين استوعبت إن الناس مو سوا، ولا هو عيب لو كل الناس
سووا شي وانت سويت شي مختلف طالما انت تحبه وتبيه ومايخدش دينك *إبهام على فوق*

 

-2-
النقد الإيجابي المجاملي

عاد بعد ماعرفت إن الناس أذواق وإني ماأحب أحد ينتقد الشي اللي أحبه بديت أطبق غلط وصرت أجامل وأمدح كل شي بوجهي، حلو مو حلو أهم شي
مشاعر الإنسان اللي قدامي، إذا اشترت فستان حتى لو أشوفه أخيس فستان بالسوق أقولها (يجنن) عاد هي اشترت وقضت كلامي مابيقدم ولا بيأخر
فالأفضل تطلع منها بمشاعر جميلة أزين من إني أقولها شي وهي بتلبسه كذا وإلا كذا
إذا أحد مدح مسلسل شفته وعطيته دروب من كرهي له، أقوله ماعليك شكلي تسرعت وأعطيته تقييم سيء، إن شاء الله بعطيه فرصة وأشوفه مرة ثانية
أحيان منجد أرجع أشوفه وغالبًا تكون مجرد مجاملة ع السريع خخخ كنت أشوف الموضوع من زاوية، الكلام ببلاش ومابيضرني لو قلت كلمتين حلوين لشخص يمكن محتاج يسمعها

مرة ورى مرة، تعرضت لنفس المواقف اللي كنت أطبقها ع الناس وصرت أشوف العبارات اللي كلها مجاملة! جديًا ماكنت مبسوطة عقب هالكلام
على إنه حلو وكله مدح× مدح! لكن مو هذا الكلام اللي أنا أنتظره!
ليش ماتفهمون إني أبيكم تنتقدون بعدل، وتعلموني السلبيات قبل الإيجابيات خصوصًا لو كان شي بتقيم عليه زي تكليف بالجامعة أو عمل فني مطلوب مني تسليمه
كلامكم الحلو ماراح ينفعني!
بعدها بديت أفكر… هاه عرفتي الحين وش كنتي تسوين؟
وبدأ ضميري يأنبني.. حسيتني كنت أكذب على كل شخص وثق فيني وجاني يطلب مني الرأي.. وأنا أمدح وأعطيهم من هالكلام اللي ماأقصد ثلاث أرباعه
السعادة اللحظية ماراح تنفعهم ولاراح تنفعني لذلك بديت أفكر بتغيير طريقتي
لا النقد السلبي ناسبني  ولا المجاملة ناسبتني 
أبي يوم أقول شي لشخص ينفعه وبنفس الوقت مايحقّر المجهود اللي بذله فيه وبعدها حاولت أغير طريقتي

 

-3-
النقد البناء

عقب الاستنتاجات القيّمة اللي كل الكرة الأرضية تعرفها  قررت أصير ناقدة بناءة 
وأقول الشي اللي فعلًا أحس فيه، بحيث لو مدحتك فانت فعلًا تستحق المدح ولو انتقدت شي من اللي قدمته فهو فعلًا ماأشعر فيه اتجاهه 
ولو جبت الانتقاد بطريقة غير مباشرة وجبانة شوي  فهو حفاظًا على رابط الثقة اللي انبنى بيننا طالما إنك استشرتني بشي 
وبنفس الوقت ضميري مابيرتاح لو رميت الحقيقة المرة على وجهك بدون أي مراعاة لمشاعرك
أحيانًا فعلًا تتقدم لي نصايح قيّمة بس تكون بصورة جدًا سيئة! غالبًا ماأتقبلها ولاعاد أستشير هالشخص أبد 
مع ذلك فيه حالات أتقبلها لو كنت حاسه فعلًا إن هالشخص يبيلي الخير 
زي بنت خالي هذي ماقط نصحتني بطريقة ممكن الإنسان الطبيعي يتقبلها  قسم بالله تكسّر مجاديفي
وتحطم كل ذرة من ذرّات الفخر على الشي اللي سويته 
بس تعطيني أسبابها ومبرراتها، وإذا كان موضع إشادة فهي تعطيك حقك على داير ملي 
عشان كذا أحبّ أستشيرها لأني أدري حتى لو أسلوبها قاسي وتعطي في الوجه فهي تبي مصلحتي أولًا وأخيرًا 
للحين أسلوب النقد البناء مامشي معي تمام  أحاول جهدي أقدم صورة وافعية للنقد
لكن للأسف دايم يقلب الرد عاطفي وكله قلوب ومدح بدون أسباب واضحة  وحتى لو كرهت شي أقدمه بطريقة أشبه بـ(كرهته ومدري ليش )
أحس النقد البناء يحتاج شخص واقعي يقدر يصف مشاعره اتجاه الشي بشكل متسلسل مطعّم بالأسباب المنطقيّة اللي تخلي الشخص اللي قدامه يقتنع 
والله يكتبنا منهم ونصير بنائين لسنا هدامين ولا مجاملين 

One thought on “-سواليف-

  1. مقال جميل فيافي انا كمان مريت بنفس هالمراحل خصوصاً لما كنت مراهقه واحس بالخطر مثل ما قلتي او الاهانه لو احد سب شيء احبه بس بعد ما تخطيت هالمرحله كثير ارتحت خصوصاً ان فيه ناس ينتقدون لمجرد رؤية التحطيم على وجهك يكونون معصبين منك في شيء او مو حابينك اصلاً فيستخدموا هالأسلوب, مؤخراً صرت ارد عليهم بعباره رائعه مع ابتسامه عريضه : (بصراحه ما يهمني رأيك ) عاد هنا انبسطي انتِ بانعكاس نظرة التحطم على وجوههم هههه
    النقد البناء برأيي المهم فيه اكثر من انك تذكرين الايجابيات هو انك تكونين صريحه بإحترام ,الناس يعرفون متى تجاملين وبعدها ما حيوثقوا يرأيك فالافضل 1تكونين صريحه 2 ونذكرين شيء ايجابي
    كمان انتقادك لنفسك قدام الاخرين وصراحتك في الامر وتقبلك الجيد للنقد الموجه منهم يخليهم يحترمونك كثيير ويرتاحون معك
    وبالتوفيق عزيزتي

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s